កណ្តាល: នារីម្នាក់បានចងកសម្លាប់ខ្លួន ដោយវិបត្តិផ្លូវចិត្ត ដោយសារតែនារីនោះ ថ្ងូរចេះតែឈឺក្បាល និងវិលមុខ។ ហេតុការណ៍ភ្ញាក់ផ្អើលនេះ បានកើតឡើង កាលពីម៉ោងប្រមាណ ៧ យប់ នៅភូមិព្រែកតានប់ ឃុំកំពង់ស្វាយ ស្រុកកៀនស្វាយ ។
នារីដែលចងកធ្វើអត្តឃាត ឈ្មោះ ហុក សំណាង អាយុ២០ ឆ្នាំមានមុខរបរ លក់ដូរនៅផ្ទះ។ ឪពុកឈ្មោះ តិច ហុក អាយុ៦០ឆ្នាំ ម្ដាយឈ្មោះ សាក់ រ៉ុម អាយុ៥៣ឆ្នាំ មុខរបរ លក់ដូរគ្រឿងសំណង់ ។
ក្រុមគ្រួសារសព បានឲ្យដឹងថា មុនពេលកើតហេតុខាងលើ ឪពុកម្ដាយ និងក្រុមគ្រួសារ នៅលក់ដូរខាងក្រោមផ្ទះ។ ពេលបាត់មិនឃើញកូនស្រី ពួកគេបានដើររក។ ពេលឡើង លើផ្ទះ ស្រាប់តែឃើញកូនស្រីបានចងក និងខ្សែនីឡុង នឹងរនងធ្នឹមផ្ទះ ស្លាប់បាត់ទៅ ហើយ។ បន្ទាប់មកឪពុក ម្ដាយ និងក្រុមគ្រួសារ បានកាត់ចំណងខ្សែទម្លាក់សព មកក្រោមផ្ទះ ដាក់លើគ្រែ មុនពេលសមត្ថកិច្ចនគរបាលប៉ុស្តិ មកដល់កន្លែងកើតខាងលើ។
ក្រុមគ្រួសារ បានបំភ្លឺថា៖ នារីនេះ ចេះតែថ្ងូរឈឺក្បាល វិលមុខ និងទំនងជាមានវិបត្តិផ្លូវចិត្ត ។ ក្រោយមក សមត្ថកិច្ចជំនាញ បានមកពិនិត្យលើខ្លួន តែមិនឃើញមានស្លាកស្នាមអ្វីប្លែកនោះទេ ហើយសន្និដ្ឋានថា នារីឈ្មោះ ហុក សំណាង ពិតជាស្លាប់ដោយចងក ធ្វើអត្តឃាតពិតមែន៕V/S
